Гвардиола: Эхний тоглолт бүгдийг шийднэ

Өнөө шөнө Улаанбаатарын цагаар 04:00-д "Сантьяго Бернабеу” буюу Мадридын "Реал”-ын стадионд Каталоны "Барселона” зочлон тоглох гэж байна. Испанийн Супер цомын төлөөх тус улсын шилдэг хоёр багийн эхний тоглолт нь энэ билээ.

Тоглолтын өмнө "Барселона”-гийн дасгалжуулагч Пеп Гвардиола эхний тоглолт бүхнийг шийднэ гэж мэдэгдсэн байна.

"Яагаад ч юм эхний тоглолт л бүгдийг шийдэх юм шиг санагдаад байна. Тэдний хувьд энэ цом их чухал гэдгийг би мэдэрч байна. "Реал”-ыг яаж тоглохыг тааж хэлэхэд хэцүү. Учир нь маш олон байрлалын тоглогчтой. Эхний тоглолтдоо бид 1:3-ээр ч юмуу хожигдож болохгүй. Тэгвэл талбай дээрээ үүнээс илүү хожно гэхэд тун хүнд. Тэд улирлын өмнөх бэлтгэлийг үнэхээр сайн хийсэн” гэж Пеп Гвардиола хэлжээ. Мөн түүнээс Ла лигийн эхний тойрогт хөлбөмбөгчдийн холбооныхон ажил хаялт зарлахаар болоод буйд хэрхэн хандаж байгааг нь лавлахад "Би тоглогчдоо дэмжиж байгаа” хэмээн хариулжээ.