Месси Европын шилдэг хөлбөмбөгчин

Европын хөлбөмбөгийн холбооноос анх удаагаа тивийнхээ шилдэг хөлбөмбөгчийг тодруулахад Аргентины шигшээ болон Испанийн "Барселона”-гийн довтлогч Лионель Месси тодорлоо. Өчигдөр Монте-Карлод болсон Аваргуудын лигийн хэсгийн сугалааны үеэр Европын шилдэг хөлбөмбөгчийг тодруулсан юм.

2010-2011 оны хуучин тивийн шилдэг хөлбөмбөгчийг тодруулахын тулд 53 улсын спортын сэтгүүлчид санал асуулгад оролцжээ. Мессигийн төлөө 38 сэтгүүлч санал өгсөн бол "Барселона”-гийн хагас хамгаалагч Чави Эрнандесийг 11 сэтгүүлч дэмжсэн байна. Харин Мадридын "Реал”-ын жигүүрийн хагас хамгаалагч Криштиано Роналдогийн төлөө 3 сэтгүүлч саналаа өгчээ.