Барселонагийн Монгол дахь хөгжөөн дэмжигчид

Мэдээ

Монгол дахь цорын ганц Барселона фэн сайт

Барсад хайртай хүн бүрт зориулав

Европын төдийгүй дэлхийн шилдэг хөлбөмбөгч Лионель Месси анх удаа шигшээ баг ахлан талбайд гарахаар болжээ. Аргентиний шигшээ баг маргааш Энэтхэг улсад Венесуэлийн багтай нөхөрсөг тоглолт хийх бөгөөд тус тоглолтод Месси шигшээ багийнхаа ахлагчийн хувиар тоглох хүндтэй үүрэг хүлээсэн байна.

Копа Америкад тун хангалтгүй амжилт үзүүлсний дараа тус улсын хөлбөмбөгийн холбооноос шигшээ багийн дасгалжуулагчийг ажлаас нь чөлөөлж, улмаар Алехандро Сабелла шигшээ багийг удирдах болсон юм.

Харин Сабеллагийн сонголт нь Месси ажээ. Аргентиний шигшээ баг Копа Америка тэмцээний дөрөвний нэг шигшээд Уругвайд хожигдсоноор дасгалжуулагч Серхио Батиста ажилгүй хоцорсон билээ.

Өчигдөр болсон хэвлэлийн бага хурлын үеэр Сабелла "Одооноос эхлэн Месси багийн ахлагч. Бид хэд хэдэн хувилбар бий болгохоор ажиллаж байна. Түүнтэй хамт хослол бий болгож чадах 1-2 хоёр тоглогчийг бэлтгэх хэрэгтэй” хэмээжээ.

Аргентин болон Венесуэлийн шигшээ багийн тоглолт Колката хотын 125 мянган хүний суудалтай "Солт Лейк” цэнгэлдэхэд болно. Дэлхийн шилдэг хөлбөмбөгчөөр ахлуулсан Аргентиний шигшээг Энэтхэгт хөл тавихад тэндхийн хөгжөөн дэмжигчид халуун дулаан уур амьсгал дунд угтан авсан бөгөөд Колката хотын нисэх онгоцны буудалд хэдэн мянган хөлбөмбөгийн хорхойтнууд цугласан байсан гэнэ.

Испанийн "Барселона” клубын од Месси болон түүний багийнхан Венесуэлийн багтай тоглосны дараа Бангладешийг зорьж, есдүгээр сарын 6-нд Нигерийн "Супер бүргэдүүд”-тэй нөхөрсөг тоглолт хийнэ. Тэд ирэх аравдугаар сараас эхлэн 2014 оны ДАШТ-ий сонгон шалгаруулалтын өмнө бэлтгэлээ хангаж буй нь энэ ажээ.