Сеск Фабрегас: Арсенал муу тоглох болно

Испанийн "Барселона”-гийн хагас хамгаалагч Сеск Фабрегас Английн "Арсенал”-ыг энэ жил Премьер лиг юмуу Аваргуудын лигт түрүүлэх ямар ч боломжгүй гэж мэдэгдлээ. Энэ зун "Барселона”-д эргэж очсноосоо хойш сүүлийн найман жилд "Арсенал”-ын хүртсэн хоёр цомыг хүртэж амжсан Сеск Фабрегас "их буучид”-ын төлөө тоглох ямар ч хүсэлгүй болчихсноо ярьжээ.

Түүний бодлоор ойрын жилүүдэд "Арсенал” томоохон ялалт байгуулж чадахгүй гэнэ. "Их буучид” Англидаа "Манчестер Юнайтед”, "Манчестер Сити”, "Челси” зэрэг бусад том багуудаас илт дутуу гэж тэр үзэж байна.

"Би жил бүр цом хүртэх чадалтай багтаа эргэн тоглохыг хүсэн. "Арсенал”-ыг би ойрын жилүүдэд томоохон ялалт байгуулна гэдэгт итгэхгүй байна. Хэдийгээр "Арсенал” сэтгэлд минь их ойр байдаг ч гэсэн Английн бусад шилдэг багуудыг гүйцэж түрүүлэхэд их хэцүү. Энэ улиралд л гэхэд "Манчестер Юнайтед”, "Манчестер Сити”, "Челси” зэрэг багийн өмнө орно гэхэд хэцүү. Тэд "Арсенал”-аас дэндүү тасархай. "Арсенал”-д бусад багуудынх нь санхүүгийн их хүч чадал байхгүй. Үүнд нь би хүндэтгэлтэй ханддаг. Тэднийг Премьер лиг юмуу Аваргуудын лигт ойрхон түрүүлнэ гэж төсөөлөхгүй байна” хэмээн Фабрегас ярьжээ.